بسرعة حمل فيديو تدريب فريق مصر قبل مباراة السودان

حفل الزار الجماعي في ستاد القاهرة

كان الاستاد يوم السبت الماضي مكانا لحفل الزار الجماعي لاخراج العفاريت والجن التي تتقمص شعبنا الطيب الغلبان واهالينا ( الملبوسين ) بالجنيات ةالعفاريت .

لم تكن مباراة عادية..وكالعادة الفريق المصري يعزف موسيقي علي طريقة فرقة " حسب الله " في حين تعزف الفرق العالمية وحتي الافريقية المتأخرة عنا حضاريا موسيقي شوبان وبيتهوفن باوروكسترا كامل وانضباط واتقان يليق فعلا بالدول المتحضرة ..كانت مباراة تظهر ثقافتنا المشهورة بالتراخي والكسل والعجز ..اختفي فريقنا في الملعب وتاهوا وكالعادة ببركة دعا الوالدين ودعوات الغلابة الذين جاءوا لكي يفرحوا بالمناسبة ويستريح بعضهم من شراء المخدرات التي يتعاطاها لينسي همومه ..جاء ليسعد ويفرح وهو " فايق"...لولاستر ربنا وجاء الهدفان ببركه والحاح ودعاء الناس..

مع ان فريق الجزائر جاء ومن قبل المباراة مهزوما محطما يائسا من رعب الجماهير المصرية علي المستوي الشعبي والرسمي .. لم يقصرأحد... الحكومة والناس والسيد / جمال مبارك الكل ارادها مناسبة من نوع اخر تعويض عن التعب والكدح والتقاط للانفاس ولكن اداء فريق الكرة قطع الانفاس في ليلة لم يشد حريفة الجوزة أي انفاس !!!

....وبعدين ايه اللي اوصلنا للحسبة دي من اول التصفيات ما احنا ضيعنا مباريات سهلة كتير ودي عادتنا ولا نشتريها جايين نذاكر ليلة الامتحان حد فاكر فسي كده ولا هو مولد وخلاص المهم الحفلة بتاعة الزار تتم علي اي شرف رياضي وبس !

...الذي اريد ان اتكلم فيه بمنتهي العقل ان اداء فريقنا الكروي في المباراة هو عادة فريق الكرة وليس بسبب الضغط النفسي الذي احاط بالمباراة ..متي غير فريقنا اسلوبه المعهودفي العك الكروي ؟؟...وهل ثبت علي اداء مميز واداء رجولي.. ومن اين يأتي هذا الاداء "وفاقد الشيء لايعطيه " .. لان مشكلة الكرة في مصر هي نفس مشكلتنا الثقافية المبثوثة في كل اركان حياتنا وفي كل الوانها ..المشكلة هنا تحديدا هو اننا مازلنا نمارس كرة القدم علي انها لعبة حظ ممكن نكسب بالمصادفة وبالحظ والعكس.. في حين ان كرة القدم عند الغرب المتحضر هو اداء علمي مدروس وتدريب جاد ومستوي ثابت لا يتغير وكرة جماعية هي جزء من منظومة الروح والعمل الجماعي عندهم.

اما عندنا فنحن نمجد ونقدس الاداء الفردي حتي مواويلنا وعزفنا وحواراتنا كله من لون المونولوج وليس الديالوج وننتظر دائما في ثقافتنا المهدي المنتظر او اللاعب الفذ المعجزة الذي سينهي المباراة او الزعيم السياسي المعجزة الذي سيحيل التراب ذهبا اصفر والصحراء الصفراء الي خضراء يانعه وسيهزم الاعداء وحده ..اما ان نعمل سويا وبروح الفريق الجماعي ونحن علي يقين بان احراز أي شيء لابد له من خطوات محسوبة ومعدودة وبعلم وباعداد وتجهيز ...كل شيء يتم السعي اليه بخطوات علمية وليس بعقلية الدروشة والفهلوة والشطارة و"فدان حظ ولا فدان شطارة" للاسف هذا هو واقعنا المتخلف في كل شيء.. وتلك الحالة العقلية والثقافية هي التي جعلتنا متميزين في صفحة التخلف ومستنقعات الجهل ..مازلنا نتدحرج الي الوراء ..وغيرنا يسابق بسرعة الصاروخ.. لاننا لم نغير ثقافة الدروشة والهطل والبركة والفهلوة والحظ..

...هذا بالضبط ايضا حالنا في كرة القدم ..اشمعنا فاشلين في كل شيء ونريد ان نفلح في كرة القدم..

والجمهور مسكين يريد ان يفرح لان الفرحة عنده مسروقة يريد ان يخرج من مشاكله اليومية ومناخ الكآبة الذي يعيشه في العمل والبيت مع زوجته النكدية وعياله اللي عاملين زي القطط..طول النهار والليل بيخربشوا فيه لغاية لما ورم..

الكل اراد من مناسبة المبارة شيء اخر غير كرة القدم ...ارادوها حفل زار لارضاء الجنيات والعفاريت اللي لابسانا وطالبه منا نكون في ستاد القاهرة اليوم ده وكودية الزار هنا هي فريق كرة القدم الفاشل رغم الدلع والفرفشة الذي يتمتع به اللعيبه اللي اغلبهم جاي من عزب الصفيح والبراجيل وعزبة الحاوي.. ولقي نفسه فجأة نجم مشهور تحت الاضواء ويقبض الملايين وبنات النادي اللي من اعلي المستويات تجري خلفه واللا الفنانات بتطاردهم وكل هم اللاعب انه يحط جيل علي شعره لزوم البت بتاعته تشوفه في التلفزيون او في الاستاد الله يرحم لما كان بيحط علي شعره سمنة النخلتين من ورا امه !..طبعا لاتدريب ولا لياقة بدنية مافيش الا لما يكون فيه مباراة يلموهم من الكافي شوب ومن نواصي الشوارع في حين اللاعب الاجنبي في الخارج ينام من المغرب ويصحي كل يوم يتدرب ويمارس رياضة الجري ومجوز ومش بيبص لواحدة رغم كثرة المعجبات بيحافظ علي لقمة عيشه ومخلص ومفيش في النادي بتاعه " ارحميني يمه " أي غلطة اخلاقية او تقصير عقاب علي طول ..ادارة وثقافة تؤكد الانضباط والجدية كمجمل حياتهم والتزامهم بنفس قواعد النجاح العلمية والعملية في كل الوان حياتهم.. ولما ينزلوا الملعب من اول دقيقة لاخر دقيقة جدية وكر وفر ومن غير تعب لعيبتنا بتوع الجيل من اول خمس دقايق ينهجوا ونفسهم ينقطع ووشهم يصفر من اللـ......وهمه وحظهم

وللاسف اللي بيزود "البلة طين " المعلقين بتوعنا بيمجدوا عند الفوز وينيلوا عند الهزيمة عاطفيين وبعدين همة اللي بوظوا اللعيبة مديح زايد ووصفهم بصفات كلها غير حقيقية لزوم انه يعرف الكل ان اللعيب ده " ابورجل مسلوخة " مش بيرحم وأغلب المعلقين ارزقية وتاريخهم اسود في الارتزاق والسرقة وبيعمل كده لزوم السبوبة وتابعوا اللي حصل ليهم في الفترة الاخيرة في صفحة الحوادث ومنهم ابووش اصفر اللي بيتكلم من بطنه ومن فضائية لفضائية لغايه ماهيجيب اجلهم قريب ..

كله كدب وكله خداع مش فيه حد بيقول الحقيقة مش فيه حد مخلص لبلده ..هي دي فعلا ثقافتنا اللي مأخرانا في كل شيء !

انا مش بحمل الحكومة لان الحكومة والريس والكل متأخرش عن الفريق من رعاية وشحن معنوي غير ان الدولة باجهزتها بتغدق عليهم وخلتهم سوبر باشوات واحنا عارفين اصلهم ايه؟.. لكن زي كل شعبنا وعمالنا ياكلوا وياخدوا كل حاجة ويبلطجوا ويزوغوا ويهربوا من تبعات النجاح والعمل الخلاق والجدية ..وفي الاخر الاعلام القذر بيرفعهم للسما مع انهم سبب نكبتنا ياريت بيعملوا بالفلوس اللي بياخوها .( محدش يقول ان انا مش وطني لان وطنيتي انا مش محتاج شهادة بيها من أي حد وانا بقول الكلام ده لصالح الوطن من مخلص مش زي بتوع الوطنيه اللي في الفضائيات الي بيتغزلوا في عيون الوطن لانهم نهبوه ..وبعد انا لما انتقد أي حد مش معناه نقد لمصر لالا لان مهما كان هو لعيب كوره او غيره محدش يقدر يقول ان الوطن اختزل في شخصه وان النقد ليه يبقي نقد للوطن.. واللا ايه ؟ )..

وكما قلت سابقا ان المشكلة تكمن في ثقافتنا ومنظومة التفكير والعمل اللي شعوبنا مش عايزة تغيرها ومهما يتعمل ليهم برضوا بياخدوا وبياكلوا وبيشتكوا رغم انهم مش بيشتغلوا وشوفوا نسبة اداء العمل الحقيقي لدي العاملن في الدولة او المدرسين او غيرهم.. الحكومة هتعمل ايه ماهوا احنا اللي بنحكم بعضينا يعني المتابع والمراقب والمدير واللي فوقه جايين من فين ؟؟ ماهمه منا طيب ايه الحل ؟؟..نجيب اداريين لينا في مجمل حياتنا من بره يديروا حياتنا ويديروا اعمالنا زي لما نجيب حكام كورة اجانب؟؟ مش معقوول ده هيحصل..متي نتغير من الداخل ونشعر وكل واحد فينا يشعر انه مسئول عن بلده وعن شارعه اللي ساكن فيه ونقوم ننضف شارعنا لانه بتاعنا مش نقعد نشكي ونشتكي الحكومة والمسئولين.. ايه ياناس حرام عليكوا مع ان ديننا العظيم فيه كل الكلام ده لكن معطل مش بيطبق من الدين اللا الشيء السهل.. التدين الشكلي.. اللي مركز علي اللون فقط.. المظهر والشكل وكل دعاة ومشايخ الصحوة وقنوات الناس وغيرها مش بيطلبوا من الناس اللا اللون السهل ده والتعصب لهم ولافكارهم اللي هي السبب في كل ما نعانيه مالقيناش صحوة دينية راشده تنزل الشارع وتهتم بمستنقعات حياتنا الرديئه وتحث الناس علي انها مسئولة عن حياتها..حتي نظافة الشارع اللي امامهم والله العظيم انا بصلي في مسجد وياما كلمت مشايخه منذ ان نشأ انهم يطلبوا الناس اللي حوالين المسجد من خلال المسجد يعملوا معسكر نظافة يوم كامل من شبابنا ورجالنا وننظف الحتة اللي حوالين المسجد من الزبالة اللي متكومة ولكأني قلتلهم حاجة "ودن من طين والتانية من عجين".. لانهم تربوا علي ان الدعوة الدينية في مجالات اخري ممكن تحسب علي انها تخريب حقيقي لمجتمعاتنا يعني لو مظاهرة او وقفة احتجاجيا هايفة هيجروا عليها لكن نظافة ونشيل زبالة ازاي مالنا ومال الموضوع د ه دا مش موجود في رسالة التعاليم..طيب يامعلم ؟؟!!!!

ومرة اخري ساكتب في مرة قادمة عن اسباب تدهور الرياضة في مصر !!

انا اعلم انني بكلامي هذا ربما كمن يغني خارج السرب ! ..مش مهم ! انا سأعبر عن رايي وهذا حقي مش كده واللا ايه ؟؟

كتبه : محمد امام نويرة

email : m_romance555@yahoo.com

تعالوا حملوا علي الفيديو فريق مصر الحقيقي وهو واتفرجو عليه !!