ياشيخ قرضاوي ممكن فتوي في ضرب السعودية للحوثيين ولاأنت مخصص لحماس؟

بالامس رأيت ندوة علي الجزيرة مباشر ( ماهيه الجزيرة تخصص قضايا مصر فقط) الندوة للاخوان المسلمين عن غزة والسور الحديدي ورأيت واحد كأن ثعبان عضه ونازل تفتفة !..وبيهاجم بقسوة وشتيمة وقلة أدب كل اللي بيدافعوا عن بناء الجدار لحماية حدود مصر وبيتهمهم طبعا بالعمالة لامريكا وبالخيانة ماهو مصري للأسف بس باين عليه بيقبض وأرزقي وعاملها سبوبة وكلامه وصلنا للأسف من خلال تفتفة من فمه القذر ..هو يعني ماينفعش غير الشتيمة وعاداتنا القبيحة المرذولة لما يكون فيه اختلاف في الرأي نحترم بعض بلا تخوين ولا تكفير ولا تفتفة وبعدين ياخي لما انت مصري انا مش هقول عليك انك مش بتخون مصر بس المفروض زي كل ناس بينتموا لوطن في أي بقعة من العالم انهم يحبوا بلدهم لانها هي الأم الحقيقية اللي بتحتوينا في احضانها وعلي ترابها ومانقبلش اي اساءة لبلدنا ودي نقطة بلاش ارجوكوا يامصريين بلاش نختلف عليها ياللي بتبيعوا انفسكم للبترول وتقدموا انفسكوا علي انكو فقط الوطنيين مع انكوا فعلا ما بتحبوش بلدكو ..للاسف !

أنا بسأل الشيخ القرضاوي ( المصري سابقا واللي معاه جواز سفر قطري بيعتز بيه ) لما السعودية ضربت اهالي اليمن طبعا بحجة ضرب الحوثيين ومن الناحية التانية اليمن بتضربهم ( ماشي مش هنختلف في النقطة دي كل بلد أدري بأمنها ) بس ياريت اسمع منك رأي فضيلتك في تلك الحرب اللي بيروح فيها مدنيين يمنيين أبرياء غير الحصار والجوع ..هل ده حلال ولا حرام ..نفسي وباتمني أسمع فضيلتك تفتي في قضايا اخري أكثر وطأة من القضايا المصرية أاللي أنت  ( متخصص فيها بس ) علشان أيه ؟ علشان انت بتفتكر ان مصر هيه الحيطة المايلة زي فهم اللي انت عايش في وسطيهم في قطر وبيوظفوك لصالح السياسة القطرية اللي أشبه "بجلابية المعلم رضا" في الافلام المصرية لبسوها  للممثل محمد هنيدي اللي هو "قطر "بحجمها المهم ماتعرفش الشيخ المحترم القرضاوي كل فتاويه عن مصر وعن حماس ولأن حماس تتبع الاخوان المسلمين وهو متربي في النظام الخاص اللي كان بيحلل قتل اي خصم للاخوان (حتي سيد فايز نفسه وكان من الاخوان)

...هل تعاطف الشيخ قرضاوي مع حماس فقط راجع لكونه من الاخوان سابقا ولا علشان مؤشر بورصة السياسة القطرية عايزة كده ولا علشان هو مايقدرش يفتي بأي رأي سياسي ضد أي دولة اخري فيها فلوس ومشايخ برضه زي السعودية مايقدرش يقرب منها من الخوف ومن سلاح التكفير المشهر دائما من مشايخ السلفية في السعودية وهو مش قدهم بالفعل ..

وعلشان كده مش قدامه غير مصر الغلبانة اللي الكل بييجي عليها والدولة المصرية هنا ما بتعاقبش أي حد بيهاجم مصر ولا بتقوله تلت التلاته كام ؟ فعلا الدولة المصرية رحيمة بأي تطاول علي مصر وسايبة الكل سداح مداح يهاجم مصر مش عارف ليه؟؟ وكاننا الحيطة المايلة أو الزوجة الضعيفة الغلبانة ..

طبعا فضيلة الشيخ القرضاوي طلع فتوي بتحريم بناء السور المصري وردينا عليه في مقال سابق طيب ياسيدنا الشيخ هو موضوع بناء سور علي حدود مصر لحماية حدودها ده شيء اساسي زي كل دولة وشوف بنفسك وقول رايك ادي السعودية بتضرب من نار وحديد الحوثيين علشان تحافظ علي حدودها وانت ساكت مقلتش رأيك ولا واخد بالك من الموضوع (لا أسمع لا أري لا أتكلم !)..يعني لو مصر عملت زي السعودية بعد ضرب حماس لجنود مصريين غلابة علي حدودها وقامت مصر زي السعودية وضربت بتوع حماس علي حدودها زي السعودية بالطيران ممكن تسكت ساعتها؟؟.. علي الاقل زي ما أنت ساكت علي السعودية الان في ضرب مدنيين وجنود الحوثيين في معارك يومية وبيخرج وزير الدفاع السعودي بعد ما قلع وخلع الجلابية البيضا بتاعته الواسعة ولبس كاكي لزوم الفضائيات والتصوير وبيعلن كل حبه عن بياناته العسكرية وكأنه في معارك مع اسرائيل وماله احنا مش زعلانين لكن أنا بقول لسيادة الشيخ قرضاوي القطري والمصري سابقا انت هتسكت زي ما انت ساكت دلوقتي لو مصرضربت بلطجية وأرهابي حماس علي حدودها بالطيران وهمة اللي بادئين ممكن نضمن سكوتك ولا هتبقي فرصة في سوق التلات تبيع فتاويك جملة وقطاعي ويزيد رصيدك في البنك ؟..وترضي امراءك في قطر وفضيلة المرشد الجديد !..وبعدين انت فتواك مخالفة لمنهج الاخوان اللي هي بتاعة تحريم بناء السور اقولك ازاي ؟ اقولك....

لما اخوان العراق دخلوا في الدبابة الامريكية بعد شيل صدام وكان دور الاخوان المسلمين في العراق دور قذر مع الامريكان واشتركوا في اللعبة بتاعة بريمر  وهاج فرع الاخوان في الاردن علي موقف اخوان العراق وغيرهم دافع فضيلة المرشد المصري عن اخوان العراق وقال الجملة المكررة حتي الملل ( أهل مكة أدري بشعابها ) طيب ياشيخ قرضاوي ماتعمل مع حكومة مصر كده وخصوصا هي برضه اللي بتمثل الشعب وبتحافظ علي امنه فحكومة مصر هي أدري بشعابها ولا أيه ؟؟..اقولك ايه وأعيد لك ايه أنا هغني مع الست أم كلثوم وأقول.. أقولك ايه عن الشوق ياحبيبي ! الشوق ولا الشيخ ؟! اقولك ايه عن الشيخ ياحبيبي !!

   أنا بأطالب حكومة مصر ان تطلق بالتلاتة الدور المصري اللي اخترعه عبدالناصر وبيعنا هدومنا وضيع مستقبلنا وانفق مواردنا علي الدور المصري والقومية العربية وفي الاخر برضه العرب بيكرهونا حقدا علينا لاننا الافضل والارقي منهم واسيادهم اعترفوا ام لم يعترفوا ولما انزنقوا الكوايته حررناهم ملقيوش غير مصر قدرت تواجه صدام والان ايران وصلت لحدود السعودية وفي اليمن والمرحلة القادمة ايرانية بالتلاته وساعة لما تحصل الازمة العرب مش هيلاقوا غير انهضنا يا اخا العروبة في مصر ياريت من دلوقتي نخلع ومالناش دعوة لاننا اولا طيبين جدا معاهم ما بنعرفش في بيزنس السياسة ناخد مقابل دورنا دعم اقتصادي للدولة الام  ومابنطلبش حاجة مع ان ده من حقنا وكل الدول بتعمله امريكا بتعمله في حرب الخليج خلت كل الدول الاوربية وغيرها يتحملوا فواتير الحرب والمكسب فوقه كمان باضعاف كفاية علينا الدور القومي نحرقه بجاز زفر وخلينا نقفل علينا حدودنا واحنا دولة قوية مش فيه حد هيقدر يتعدي علينا لكن  الحرامية اللي في السوق هيقدروا بس علي الصغار والضعاف يبقي نخلع من أي دور لانه العرب في النهاية مش بتحبنا لاسباب نفسية وحضارية وبعدين مسألة العرب كجنس عمرهم ما اتوحدوا لانهم قبائل طول عمرها بتحارب في بعض ده تاريخهم ومش هيتغير الاسلام العظيم فقط هو اللي رفع اسهمهم لكن رجعوا لطبعتهم كعشاق دم واحنا زي اي دولة اسلامية كبيرة نيجريا اندونيسيا تركيا مالهمش دعوة بالعرب ولا قضايا العرب ومستريحين والله من قرف العرف ..ودمتم !

كتبه : محمد امام نويرة

.