انتخاب مرشد الاخوان الجديد عادل أمام

اّخر نكتة في عالم السياسة ..تقول :

اتنين واحد من الاخوان وواحد ازهري معمم في مناظرة عن مين الأحسن الأزهري يقول :

ـ انا الشيخ بتاعنا اسمه بيتردد في كل بيت مصري وكل لحظة ..

الاخوانجي ـ ازاي ؟؟ !

الأزهري ـ انت مش بتسمع في كل بيت اي طفل او بنت او غلام بيقول كل حبه ياطنط ...ياطنط ..ياطنط ..؟؟

الاخوانجي ـ وفيها ايه دي ؟؟

الأزهري ـ انت مش واخد بالك يقصدوا طنط...اوي ....ماهي كلمة طنطاوي جاية منها واشتق كلمة طنط تحببا وتقربا من المصريين لأسم شيخنا طنطاوي ايه رأيك عندكوا زيها ؟؟ ! اظن انت اتكبست ..كبسة وشك اصفر ليه ؟؟!!

الاخوانجي ـ عندي اللي انقح منها !

الأزهري ـ هات ...وريني ! ان كنت شاطر !

ألأخوانجي ـ ايه رايك ان المرشد الجديد بتاعنا زي سيدنا عمر بن الخطاب !

الأزهري ـ لا لا لا ...دي واسعة خالص..أزاي يكونوا زي بعض وده صحابي جليل لايمكن يتكرر تاني أبدا !

الأخوانجي ـ أقولك مانت اصلك مابتفهمش ! ..هو مش سيدنا عمر بن الخطاب أمام عادل ؟؟... ومرشدنا الجديد عادل أمام !!!!!!!!

الأزهري ـ .............................

الجمهور اللي بيسمع المناظرة واحنا معاه ....................؟؟!!

 

وانتهت المناظرة ولكن تساؤلاتنا لم تنته ...

أولا بالصلاة علي النبي صلي الله عليه وسلم مبروووووك للمرشد الجديد اللي باين عليه بيبشر بمستقبل واسع ولونه ابيض لون وشكل الجلابية اللي طلع بيها في المؤتمر الصحفي ! ..مع ان الشيخ حسن البنا كان بيلبس بدلة ! مش مهم اقلب الجلابية اقصد الصفحة وخليك معايا ..ماشي ..وفتح عينك تاكل ملبن ...احنا نبارك للمرشد الجديد مين فيهم المرشد العلني اللي هو ظهورات لزوم الاعلام وحضور الولائم والزفة الاعلانية وحضور حفلات الختان والسبوع والعقيقة ..ولا المرشد السري الخفي علي طريقة اللهو الخفي اللي هو ماسك كل العرائس في يده بيحركها زي ما هو عايز اللي هو محمود عزت اللي كان قبله كمرشد سري وبعدين علني فترة قبل ما يتوفاه الله الاستاذ مصطفي مشهوربتاع قضية السيارة الجيب الفاشلة .. ومسلسل المرشدين السريين من ايام ما طلع فكرة يعملوا الجهاز السري وبعدين النظام الخاص يعني الجناح العسكري بس اهو في الاخر كله عسكري ..المهم كل المرشدين العلنيين وحتي ايام الشيخ حسن البنا طلع في الاخر انهم فالصو مش دهب حقيقي مش عيب فيهم لا سمح الله مين يقدر يتكلم في فضيلة الشيخ المستشار حسن الهضيبي ولا الاستاذ الفاضل عمر التلمساني استاذ الادب الجم والاخلاق لانه كان ابن ناس وابن اصول مش بتاع حواري ولا حلق حوش لالا هو السبب اللي جعل للاخوان كل هذا الزخم وسط شباب الجامعات والتيار الاسلامي الحر.. المهم كلهم محترمين لكن لقيوا ارواحهم في الاخر ظهورات مش اصليين ومنظرة لكن تنظيم الاخوان ليه مرشده السري اللي بيحرك كل الخيوط وكل الناس بتأتمر بأمره زي الحاكم بأمره اللي حرم أكل الملوخية علي المصريين ...والوقائع دي معروفة ومنشورة في كتب الاخوان ومذكراتهم من اول كتاب احداث صنعت التاريح لكتب احمد عادل كمال الي اخره ..كتب كتير بتحكي عن حكاية المرشد السري اللي ماسك كل حاجة في ايده واتباعه ايضا في المكاتب الادارية وفي الفروع الاخري اللي لبست طاقية المرشد السري ونالت البركات منه وبالتالي همه ممثلين للمرشد السري اللي سره باتع وبيحكم تنظيم الاخوان في المحافظات من خلال افراد ممكن يكون الواحد منهم عضو مكتب اداري عادي وفيه مسئول للمكتب الاداري ظهورات برضه لزوم التبارك بالجلسات ولا ليه اي دور غير" ادعيلنا ياعم الحج " ..ويبوسوا علي ايده.. وعم الحاج ماهوش عارف حاجه اكتر من احساسة ان الناس بتتبارك بيه وامور التنظيم في ايد التاني اللي قاعد بعيد ده وماسك سبحة ومن غير.. وهو الي بقرر كل حاجه ..والانتخابات الاخيرة اظهرت فقط اعلاميا قوة التنظيم الخاص بتوع 65 لكن همه من زمان ماسكين التنظيم وبيعتبروا انفسهم همه الاخوان حتي داخل الاخوان انفسهم ليهم تصنيف للاخوان غير المقرر بيه في اللوايح يعني ممكن واحد اخوان وبيرشح نفسه باسم الاخوان وشيخ ازهري مثلا ورغم كل اللي بيعمله لاجل دعوة الاخوان لكني بتوع النظام الخاص يقولوا بينهم وبين بعض ده مش اخوان يعني غير مؤتمن عليه ولايصلح للتنظيم السري والنظام الخاص يعني بس عيشوه في البمبه انه اخوان واستنزفوه وممكن ياعيني يسجن بسبب انتماؤه للاخوان وهو مش عارف ان الاخوان مش بيعترفوا بيه انه اخوان ..الاخوان همه اللي ابتدعوا بالطريقة دي فكرة التنظيم ابوراسين ! للاسف الشديد عمموها في كل مكان حتي حماس برضه رغم انه بقي في مجلس وزراء من الاخوان وليهم رئيس وزراء من الاخوان لكن لايملك القرار اللا بعد مايوافق عليه المرشد السري والعلني عندهم خالد مشعل وهكذا فكرة التنظيم ابوراسين ويابخت من جمع راسين في الاخوان ..

ما علينا...يعيني بالمفتشر المرشد الجديد بارك الله فيه مالوش اي دور غير الاستهلاك المحلي ..والامور بتقرر داخل الاخوان بايد ناس تانية بتلتقي في السر وتقرر القرارات بعيدا عن اللوائح المقررة عندهم ..والانتخابات الاخير اظهرت كل شيء اعلاميا بقت المسألة علي المفتشر وعلي عينك ياتاجر واللي اضطرهم لكده كهربا زايدة من المرشد اللي توكل علي الله محمد عاكف حطهم في وضع ومأزق بسبب علاقته بعصام العريان لكن التنظيم الخاص بسرعة استوعب الموضوع وعصام العريان اللي الاعلام بيقول عنه تيار اصلاحي هو اصلا مفيش تيار اصلاحي دي اسماء ابتدعها الاعلام علي نسق الاحزاب الاوربيه المحترمة احنا مش كده لالا عصام العريان هو من التيار النفعي وليس الاصلاحي وادي خازوق وبمبه في زميل وزميل كفاحه عبدالمنعم ابوالفتوح وخلاه ياخد الصابونه واتفق مع بتوع النظام الخاص مع محمد عاكف علشان يسكت ويقولوله انت كبيرنا برضه واهو نفذنا طلبك وادي ملف الانتخابات في ايدك لانك البركة وطبعا لافيه انتخابات ولا يحزنزن الامور متربطة وامضاءات وتوقيعات شوري الاخوان علي بياض وجاهزة ما هو ده نفس اللي بيحصل في ايران وكل التيارات الاسلامية تيار داخل تيار بيعطي لنفسه انه الوصي علي اناس باسم الحفاظ علي الدعوة والاسلام وعنده فتاوي معلبة لتزوير الانتخابات باسم مصلحة الدعوة ومصلحة الاسلام.. بل وفتاوي جاهزة للتخلص من الخصوم داخل الجماعات نفسها وبتبرير ديني انه لصالح الدعوة ( فاكرين سيد فايز ) اللي لوثوا ايديهم بدم الاخوان همه اللي في ايدهم كل حاجة ! ..للاسف دي هي تجارب الاسلاميين الفاشلة اللي مفيش فيها تجربة محترمه الناس تقدرها وتعجب بيها زي تجربة السياسة والاحزاب والحكم في الحضارة الغربية ماتلاقيش عندهم الازدواجية دي ولا التناقض ده ولا فيه حد باسم الوطنية يحاكم ويخون اي فرد او طائفة وادي بوش حصل لحكمه مراجعه من شعبه وسقطوه مع انه كان ممكن يعمل زي الاسلاميين عندنا ويدعي انه الوحيد الوصي علي مصلحة وطنه ويتخلص من معارضيه لكن احنا بنبدع فقط في الافراط في استخدام الالفاظ والشعارات لكن بنرتكب كل الموبقات باسم مصلحة الدعوة

المهم مبروك للدكتور عصام العريان ارجو انه بعد ماشفته صغر في السن تاني وبيضحك في حفلا ت الاخوان الاخيره ارجوا ان المنصب الجديد وعضوية مكتب الارشاد الللي موت نفسه عليها وخسر صاحبه ارجوا انها تقدر( تغطي ) الدكتور عصام العريان
وبعتذر للدكتور محمد حبيب لانه معدش (حبيب الاخوان) ومبروك للدكتور( محمول عزت ) اللي بالمحمول حرك تنظيم الاخوان وكان دايما بيتصور والمحمول علي ودانه ..وهزعل علي الشو الاعلامي اللي هنفتقده بغياب الاستاذ محمد عاكف والمرشد الجديد مش هنسمع صوته الا كل سنة مرة الاستاذ محمد بديع علي رأي محمد عبدالمطلب زوروني كل سنةمرة والصحافة هتفتقد حركات وتصريحات محمد عاكف

اعظم الله اجركم جميعا وبارك الله في عادل امام المرشد الجديد !!!

كتبه : محمد امام نويرة